आगामी ३० वैशाखमा हुने स्थानीय तह निर्वाचनमा तेह्रथुमबाट ७२ हजार आठ सय ९५ जनाले मतदान गर्न पाउने भएका छन् । जिल्ला निर्वाचन कार्यालय तेह्रथुमका अनुसार २९ वैशाख २०७९ सम्म १८ वर्ष पूरा भएका मतदाताहरूले निर्वाचनमा सहभागी हुन पाउने छन् ।
कार्यालयको तथ्यांङअनुसार आठराई गाउँपालिकाबाट १४ हजार एक सय ३०, छथर गाउँपालिकाबाट १२ हजार ३१, फेदाप गाउँपालिकाबाट १२ हजार आठ सय ९५, मेन्छ्यायेम गाउँपालिकाबाट ६ हजार तीन सय ५५, म्याङलुङ नगरपालिकाबाट १४ हजर सात सय ३७ र लालीगुराँस नगरपालिकाबाट १२ हजार सात सय ४७ जनाले मतदान गर्न पाउने छन् ।
जसमध्ये ३६ हजार नौ सय ७३ पुरुष र ३५ हजार नौ सय २२ महिला छन् । दुई नगरपालिका र चार गाउँपालिका रहेको जिल्लामा ५७ मतदान स्थल र ९५ मतदान केन्द्र रहने निर्वाचन कार्यालयका सूचना अधिकारी दीपक भण्डारीले जानकारी दिए ।
निर्वाचनका लागि म्याङलुङ नगरपालिकामा महेन्द्रप्रसाद पोखरेल, लालीगुराँस नगरपालिकामा मदनप्रसाद पराजुली, आठराई गाउँपालिकामा पारसमणि पोखरेल, फेदाप गाउँपालिकामा ईन्द्रकुमार श्रेष्ठ, छथर गाउँपालिकामा टेकप्रसाद पुलाम र मेन्छ्यायेम गाउँपालिकामा पुष्पराज बराल निर्वाचन अधिकृत तोकिएको जिल्ला निर्वाचन कार्यालय तेह्रथुमले जनाएको छ । तेह्रथुममा ४३ वडा छन् ।